ВИДЕО-MИЦКОСКИ: Овој народ и Македонија даде многу, а за возврат не добија ништо

Како што информиравме и во претходните наши објави, вчера вечерта се случи најголемиот собир во историјата на Македонија, веднаш после собирот на 8-ми Септември. Меѓутоа, овој собир претставуваше и директен протест на македонскиот народ кон сите порази кои ги претрпи нашата земја, а на истиот говореше претседателот на ВМРО-ДПМНЕ Христијан Мицкоски.

“На локалните избори, драги пријатели ви ветив борба и таа борба донесе голема победа. И денес со чест и крената глава стојам пред вас и ви ветувам борба и ви ветувам дека ова ќе биде триумф. Не победа туку голем историски триумф на народот против корумпираните политичари.Уверен сум драги пријатели, и тврдам дека денес се случува народ, и на секоја власт на која ѝ се случува народ, прашање е на време кога ќе се втурне во провалијата и ќе падне со целиот нејзин срам и страв.И оние кои велат  – аха, значи не можете да ја соборите власта брзо – одговорот ќе го најдат во фактот што ниту една власт која узурпирала толку многу како оваа, што го ограбила народот толку брутално како оваа, и врз кој извршила толку брутални предавства како овие – не може да си замине преку ноќ со само еден народен собир! Но јас одовде ви ветувам триумф, историски триумф! Борба, борба до последна капка пот. Борба со последниот атом! Заедно да се бориме и да се избориме за крај на оваа мрачна ера на криминал и предавства која го носи потписот на СДСМ и ДУИ! 

И дозволете, на средината од говорот, многу јасно да ги кажам нашите позиции по најважните прашања и како ќе делуваме во периодот што следи:

Состојбата во Македонија е неподнослива.

Македонија во овој момент е рекордер во Европа по три работи: првата е криминалот, втората, државата е со најслаб раст на економијата во Европа, и третата земјата има најнизок стандард на граѓаните и со најголема стапка на инфлација. Можеби кризата е увезена, но автентична е неспособноста на кадарот на СДСМ.

Најголемиот проблем драги пријатели е инфлацијата која го јаде сечиј домашен буџет. И секое минимално покачување на плата со која се фали Владата, се одзема преку само едно покачување на цените на бензините, не споменувајќи ги покачувањата на сите останати производи.

Само едно покачување на цените на бензините, не споменувајќи ги покачувањата на сите останати производи.

Всушност сте забележале ли среќен човек кој излегува од пазарање од маркетите? Нема таков затоа што работите кои минатата година сме ги плаќале по една цена денес се двојно поскапи.

Половина милион наши сограѓани, луѓе со конкретни лични судбини и стравови живеат со само 150 денари на ден!

Повторувам: со само 150 денари на ден!

Сиромаштијата го разјадува здравјето на луѓето, а со тоа и здравјето на Македонија!

Затоа, час поскоро, брзо и посветено мораме да ставиме одлучна народна точка на овој економски геноцид на Димитар Ковачевски, на Зоран Заев и на СДСМ и ДУИ!

Уништениот стандард на граѓаните е последица на криминалот и неспособноста на владата да се справи со ценовните шокови.

Она што боли е што илјадници родители си легнуваат со помислата дека се неуспешни поради тоа што државата им го одзема сонот за нивните деца и што илјадници семејства мака мачат како да ги платат сметките за струја и режиските трошоци.

Кога велам дека е состојбата неподнослива, тоа е така и затоа што цели пет години чекаме датум за преговори со Европската Унија кој никако да дојде, а беше главното ветување на СДСМ. Не понижија, не засрамија, не предадоа и се уште сме заглавени во чекалницата на Европската Унија. 22 години, ревносно чекаме во чекалницата на ЕУ, некои држави тогаш не ни зборуваа за ЕУ, а денеска преговараат или се веќе членки на таа истата ЕУ.

Овој народ и Македонија даде многу, а за возврат не добија ништо. Поради погрешната политичка стратегија им се одзема иднината на тие генерации млади луѓе, на овие млади луѓе кои ги гледам овде пред нас. Како продолжение на таа политичка агресија што се врши врз Македонија и македонскиот народ и граѓаните на Македонија пристигна последниот предлог кој е актуелен овие 2-3 дена. Тој предлог којшто овие од владата се прават дека ниту го виделе ниту слушнале, за него, а тие го договарале.  Да бидеме на чисто, тоа е ништо друго освен капитулација без одлагање. Што би се рекло бугаризација на Македонија на рати или дипломатски нокаут.

Дозволете ми во неколку реченици да го објаснам тоа што го пишува во тој предлог.

Како прво, нема датум за почеток на преговори во тој предлог, туку има услов, ако сакате да почнете отворете го Уставот и исполнете ги барањата на Софија.

Второ не лажеа дека не преговараат за јазикот, дека не преговараат за идентитетот, а денес оние платени за волја на вистината малкумина владини пера, преку мали колумнички не убедуваат дека триумфирале по којзнае кој пат, го заштитиле македонскиот јазик. Па нели е премногу од срамот?

Трето, тоа што до вчера беше наш проблем со официјална Софија, во овој предлог станува наш проблем со официјален Брисел и целата Европска Унија. Или да бидам попрецизен асимилација, бугаризација па потоа европеизација или никогаш нема да бидеме дел од Европа.

Постојано нови барања и ригидни уцени!

Постојано инфлација на напади кон македонскиот народ и крајно неразумни притисоци.

Стојам овде пред вас, стојам наспроти владата, ако не е таму, сигурно ќе му пренесат, оваа порака е до Димитар Ковачевски. Те разбирам, знам каков проблем имаш, што би рекле нашите повозрасни ти си меѓу ковалната и чеканот. Од едната страна менторот, твојот стопан ти вели немој да си ја напуштил фотелјата уште имаш бизниси да ни заштитиш нам како семејство. И второто, твојот коалиционен партнер кој што ти вели немој да го отфрлаш овој договор, овој предлог затоа што утре ќе излеземе од владата и истата ќе ти падне. Немој да се грижиш, немој Димитар да се грижиш, еве јас сум тука, овој народ е тука, излези, охрабри се и одбиј го! Одбиј го овој предлог! Ние стоиме позади тебе! Одбиј го овој предлог, еднашка во животот одбиј го, охрабри се и биди достоинствен! Не го слушај менторот, остави ги овие кои што велат дека ти ја држат владата. народот, народот е тој кој што бира и менува Влада. Овој народ ќе те оправда ако утре излезеш и го одбиеш овој предлог.

Што се однесува до Бугарија, сакам јасно да посочам дека ниту јас, ниту ВМРО-ДПМНЕ нема да прифати никаков понижувачки договор на штета на нашите национални интереси. А, ако Владата реши да го носи надвор од Собранието или на сила во Собранието, тогаш идната Влада на ВМРО-ДПМНЕ нема намера ниту една точка од овој договор да почитува и да применува. Тоа на сите треба да им е јасно.

Една порака и до официјална Софија, наместо да нѐ поддржувате како соседи, вие не блокирате и неповратно ги оддалечувате нашите два народи, македонскиот и бугарскиот. Наместо да нѐ поддржувате, вие нѐ сопирате, тоа ли се добрососедски односи. Наместо да дојдете овде во Скопје и да клекнете и да се извините за злоделата кои што сте ги направиле овде врз овој народ за време на фашистичката окупација во Втората Светска Војна, вие сакате да ни ја ретуширате историјата. Тоа не се европски вредности и тоа нема никаква врска со Европа. И тоа нема никаква врска со тие вредности за кои што сме се бореле од самото формирање на ВМРО-ДПМНЕ. Тоа е она кое што секој еден од нас го мачи, го тишти. И сакам уште еднашка да бидам јасен, 80 пратеника, 2/3 менуваат Устав, а тоа и зависи од ВМРО-ДПМНЕ. Додека јас сум претседател нема да се смени Уставот, за да бидат бугарските барања дел од него.

Драги пријатели,

И навистина не можам да се изначудам на лековерноста и понижувањето кое го трпи Ковачевски во континуитет од Бугарија. Во регионот доби улога на чиракот од Македонските народни приказни каде ништо не бекнува на сите провокации кон Македонија. И кога ја гледав онаа снимка на Рама и Ковачевски освен што ме фати голем срам и нервоза поради понижувањето кое ѝ го приреди на Македонија, што гласно се смееше на изјавата дека сме Западна Бугарија, си велам доброто е што барем го препознаа кој е и како се вика, затоа што во државава е толку непрепознатлив што дури, ако не се овие автентични гафови уште народ ќе мисли дека Заев е премиер, што да бидам искрен за волја на вистината и така е.

И секако има и такви платени кои ја бранат власта и кои фатени во ваков теснец мора да го бранат, па би рекле, а вие што би направиле вие?

Што би направил, само требаше да му се заврти и да му каже, господине Рама вие ниту разбирате географија, а уште помалку историја.

Ова е мојата Македонија!

Драги пријатели и во продолжение сакам на ова да предупредам.

Власта е готова, броени ѝ се деновите, и единствено што ѝ преостанаа се лагите. И ние како ВМРО-ДПМНЕ не се бориме против нивните политики, туку против кампањата на лагите. Тие не произведуваат политики, тие произведуваат лаги. Па така брутално и безочно лажат. Ќе им кажеме нели дека РЕК не работи затоа што има скапи поправки и транспорт од кои заработуваат фирми блиски до власта, тие ќе излезат и ќе кажат дека во мое време се покачила струјата што е ноторна лага. Потоа ќе излезат и ќе кажат дека јас сум го оставил ЕЛЕМ во долгови, а ноторна вистина е дека им оставив 30 милиони евра на сметка и 0 долгови. И така редум. Тие ќе си лажат мислат дека ќе се посипаат со пердуви и народот ќе им верува во нивните лаги и нивните невистини.

Значи наместо да продуцираат политика драги пријатели, тие продуцираат лаги. Притоа сакам да предупредам дека нѐ чека една од најтешките зими досега во овие 30 години независност. И со ваква неспособна власт лекот не е пакет мерки, туку излезот се избори како единствено решение за слобода на народот и за слобода за Македонија.

Ковачевски досега не излегол на избори, на анкети губи убедливо, и десетици илјади граѓани денеска, а и деновите претходно,  му протестираат. Пораката е јасна.

Ова денес е најсилната порака дека народот сака избори. Ковачевски не се криј, излези, соочи се со народот, немој да се криеш позади овие канцеларии.

Се поставува прашањето, како до избори?

Активна блокада. Активната блокада во Собранието го даде посакуваниот ефект. Воедно сакам да предупредам доколку нема договор за предвремени избори ова лето потоа ќе преминеме во фаза на целосна блокада. Таа целосна блокада ќе биде во Парламентот, но и блокада на институциите, блокада на патишта, протести низ градовите. Блокада на процедурите и системот во распаѓање. На тој начин нема да легитимираме систем кој е диво месо и затруен од криминал и неспособност.

Дали сево ова ќе има штети, некој ќе праша? Одговорот е најголемата штета сега ја плаќаме, а нашата блокада ќе биде за спас од таа штета.

И нема време за чекање затоа што кризата ќе биде уште поголема и уште пофатална. Најтешката зима следи, а со оваа влада ќе биде вистинско економско цунами за народот.

Драги пријатели, ние досега сме имале работно лето, но ова лето ќе биде протестно лето во чиј фокус ќе биде Македонија на прво место. Тоа подразбира дека тимови на ВМРО-ДПМНЕ ќе ги посетат сите градови и села, пратениците, Извршниот и Централниот комитет, заедно со градоначалниците на ВМРО-ДПМНЕ, ќе работат на општа мобилизација и изразување на незадоволство од политиките и лошата перспектива и економска состојба. Ќе се обратиме до земјоделците, докторите, работниците, професорите, службениците, невработените, стопанствениците, до целиот народ и ќе побараме да ни се придружат.

Македонија на прво место во одлуките, во делувањето, за нашиот народ.

Нас ни е потребна општествена поддршка за целосен триумф врз мафијата во политиката.

Драги пријатели, оваа есен ќе биде есен на блокада на неспособноста и на сè она што претставува оваа власт. 

И пред крајот, сакам да потсетам на некои работи. Пред неколку месеци понудив до Ковачевски тимови за помош во повеќе клучни области и средба на која ќе зборуваме за сево ова. До денес нема никаков одговор. Сакам да знае дека од денес единствената средба што ќе ја прифатам е таа на која ќе зборуваме само за клучни теми за Македонија и за предвремени парламентарни избори.

Драги пријатели, браќа и сестри,

Оваа борба е заедничка.

Се обраќам до секој еден човек.

Сакам да знаете дека во овие времиња клучно е политички да се активирате.

Немојте да се повлекувате или да седите од страна.

Македонија е на колена и сите нè вика!

Клучно е да земете учество во политичкиот живот.

Секогаш кога поединците и паметните глави се повлекуваат, на сцена доаѓаат лукративните политичари кои ќе одлучуваат во име на умните глави.

Сега, како никогаш порано е важно да се активираат интелектуалците во Македонија.

Не е доволно само да се коментира во приватни кругови и во затворени тесни групи!

Дојде часот кога мора гласно да се каже ставот!

Оваа нација треба да биде водена од интелигенција и мудри глави.

Го повикувам МАНУ, ја повикувам Македонската академија на науките и уметностите, универзитетите во Македонија  и сите научни институции, синдикатите да се активираат во надминувањето на кризата која е наше секојдневие.

Кажете гласно и јавно што ве мачи, кажете гласно и јавно како можат да се подобрат нештата и што треба да се смени, а во мене ќе најдете партнер соборец и пријател.

Ги повикувам нашите сограѓани Албанци.

Мораме заедно да се избориме за подобро заедничко утре!

Зарем ќе дозволите ДУИ да биде газда на вашите животи, кога вие сте сопственик на вашата слободна волја.

И ако ви кажуваат дека ВМРО-ДПМНЕ била причина за тешката положба на вашите животи, тогаш јасно треба да им кажете в лице дека ДУИ и СДСМ десеткратно повеќе ви ги згорчиле вашите животи и животите на сите граѓани на Македонија!

Погледнете само како сложно ја напуштија расправата за причините за палењето на модуларната болница во Тетово!

Сложно ѝ завртија грб на вистината како да се работи за тендери од какви крадат секојдневно од народот.

Не им верувајте на стигмите што секој ден ги фрлаат врз ВМРО!

Сакам јасно да ви порачам дека истите центри што ви ги загорчуваат вашите животи, а кои не нудат решение за ниту еден ваш проблем, се изворот на оваа негативна пропаганда меѓу Албанците за ВМРО-ДПМНЕ!

ВМРО-ДПМНЕ е отворена партија!

И за Македонците

И за Албанците!

И за Турците!

И за Србите, Власите и Бошњаците, Ромите, Египќаните и сите останати!

Тука сме за сите ограбени, понижени и обесчестени граѓани на Македонија!

Им подаваме рака на сите! Придружете ни се во нашата борба за нашата мајка Македонија.

Сакам една посебна порака до оние кои се иселија. Ова е битка и за нив. За луѓето од Струга и струшко, за мавровско реканскиот крај, од Ростуше, Лабуништа, Пласница, Урвич , Могорче, Отишани, Џепиште, Косоврасти, бев во Косоврасти преубаво место и многу други од многу населени места  кои бескрајно ја сакаат Македонија, а се приморани да одат во Италија, Швајцарија, Германија и други земји. Нека знае и мајката од Јеловјане која го чека своето чедо, и оние кои не го слушаат џагорот по улиците на Скудриње. Мора да ги вратиме овие луѓе тука во Македонија. Тука им е местото, тука каменот тежи дома.

Изразуваме подготвеност заеднички да се избориме за новото утро кое ќе донесе ново сонце на слободата, подобар живот и правда!

Дојдете со нас да се бориме заедно!

Вечерва драги пријатели, сакам да им се обратам и на оние од тврдото цврсто македонско десно ткиво кои сè уште, морам да признаам и да бидам самокритичен, кои сѐ уште наоѓаат забелешка за некој наш потег.

Почитувани пријатели од десницата, размислете добро.

Ве повикувам длабоко да го ставите прстот на челото.

Со смирен ум и отворено срце анализирајте и донесете суд: кој ви е подобар пријател или подобра опција.

Оваа власт која донесе предавства или ВМРО-ДПМНЕ која се бори против тие предавства?!

Со сите наши недостатоци и слабости, ВМРО-ДПМНЕ е единствениот и најголемиот браник против неправдите, тешкиот живот и предавствата.

Дојдете да се обединиме.

Време е!

Македонија тоа го бара од сите нас.

Драги браќа и сестри, ќе се обратам и до оние кои се СДСМ, но знаат дека работите не одат на добро зошто проблемите за реалниот човек се исти. Вашите дедовци и баби исто така учествуваа во растењето и во создавањето државата и вие можеби ја посакувате таа партија, но на сите нас треба да ни е поважна Македонија која гледаме дека сега брутално се краде и уништува. Зарем ќе дозволите овие луѓе да ја крадат и вашата иднина. Да не дозволиме Македонија да биде заложник на 10 до 20 души кои ги узурпираат процесите.

Сакам да се обратам и до огромното тивко мнозинство неопределени.

Тешко ви е.

Едвај крпите крај со крај.

Несигурноста ви носи голема неизвесност која силно ве тишти.

Не гледате надеж.

И повеќето од вас си мислите сите се исти.

Оваа влада ја знаете.

И знаете дека ништо добро не може да очекувате од неа. Но, ние – оваа генерација на нови ликови во политиката ја бараме и ја чекаме вашата поддршка.

Од една страна имате луѓе што знаете дека не можат ништо подобро, а од другата страна нè имате нас за кои вреди да ризикувате да ни дадете шанса, затоа што, ви велам, нема да ве разочараме.

Вие ја одредувате иднината!

Вие сте тие кои ја носите Македонија!

На вас се чека.

Драги пријатели – на крајот..

Се обраќам на целиот народ на сите граѓани во Македонија потребно ни е обединување општествена поддршка нема инстант победи почнуваме и од сега па натаму продолжуваме низ градовите и улиците да се бориме. До конечен пад на оваа корумпирана и криминална власт.

Ми велат  – има ли светло на крајот од тунелот.

Јас велам има!

И јас не само што го гледам тоа светло, туку ве повикувам заедно да чекориме до тоа светло!

Светлото на крајот од тунелот значи да ја промениме власта и да обезбедиме сите наша заедничка перспектива и иднина.

Да ја вратиме надежта и еланот во нашите срца како тој 8 септември 1991 година.

Овие избори да не бидат избори за власт, туку референдум за Македонија.

Да дојде нова генерација способни луѓе која ќе направи нов пресврт, нова страница и нова епоха за Македонија.

Да обезбедиме работа, повеќе пари и сигурност за сите семејства.

Да одиме напред во културата, образованието, претприемништвото.

Да ги поставиме дефинициите на новиот патриотизам во кој веруваме!

Да ја градиме Македонија за сите граѓани и Македонија да ни биде на сите на прво место, без разлика на етничката припадност!

Доста беа поделби, предавства и криминал.

Да си ја вратиме земјата во наши раце, во рацете на народот, а не во овие кои што ја украдоа, ја предадоа, ја понижија, ја осиромашија.

Пред четири години јуни беше, мојот тогашен говор го завршив со порака до моите два сина кога им реков дека покрај нивната биолошка мајка имаат уште една и таа е Македонија и така ги воспитувам. Едниот е сега средношколец, а другиот од први септември ќе тргне прво одделение.

На мојот последен роденден работев во штабот, беше кампањата за локалните избори, дојде и ми остави едно писмо. Го отворив и на него пишуваше „Среќен роденден тато, да бидеш среќен…“.

Многу малку напишано, а со големо значење. Дали можеме да бидеме ние среќни, ако твојата Теа, ако твојот Марко, ако Петре, ако Аниса или било кој друг е несреќен?

Не можеме ние да бидеме среќни ако тие околу нас се несреќни. Затоа, мојата порака до Антониј и до Јован, работете, сите околу вас да бидат среќни, затоа што само среќни луѓе се луѓе кои што можат да не водат напред. Работете и сакајте ја вашата втора мајка Македонија.

Одиме до крај. Одиме до победа. Победа. Заедно, сплотено и обединето. Победа за Македонија!”-истакна Мицкоски.