Синоќа во Прилеп свечено беше спуштена завесата на јубилејното 60. издание на Македонскиот театарски фестивал „Војдан Чернодрински“

Со свеченото доделување на наградите синоќа беше спуштена завесата на јубилејното 60. издание на Македонскиот театарски фестивал „Војдан Чернодрински“! Фестивал кој шест децении претставува еден од најзначајните столбови на македонската култура и театарска уметност.

“Изминативе фестивалски денови Прилеп повторно беше град на театарот, уметноста, инспирацијата и креативниот дијалог. На сцените во нашиот град се сретнаа врвни театарски остварувања, уметници и љубители на театарот од целата држава, потврдувајќи уште еднаш дека Прилеп живее со театарот и дека фестивалот „Војдан Чернодрински“ е дел од идентитетот на градот и неговите граѓани.

Чувствувам особена гордост што токму Прилеп веќе 60 години е чувар на ова непроценливо културно наследство. Овој јубилеј е сведоштво за посветеноста на генерации уметници, организатори, институции и граѓани кои го граделе угледот на фестивалот и го претвориле во препознатлив симбол на македонската култура.

Упатувам искрени честитки до сите наградени уметници и ансамбли, како и до сите учесници кои придонесоа за уште едно успешно фестивалско издание. Честитки и до организаторите, селекторите, жирито, техничките екипи, волонтерите и сите кои беа дел од оваа голема културна приказна.

Особено радува успехот на нашиот народен театар „Војдан Чернодрински“ од Прилеп, кој годинава освои награди во дури пет категории. Ова признание е потврда дека и покрај бројните предизвици и тешките услови, трудот и посветеноста на нашите уметници создаваат вредности кои се препознаваат и се наградуваат.

Можеби многумина ќе имаат критики на оваа објава и да, секое мислење заслужува внимание, но наместо да се задржиме само на критиките, би сакал да ја поставам дилемата која треба сите да не поттикне на размислување: што секој од нас направил за оваа состојба да биде поинаква и подобра? Не само во театарот, туку и во сите области од живеењето во нашиот град.

Успешните приказни најчесто се раѓаат во тешки услови, а токму ваквите достигнувања покажуваат дека кога има знаење, љубов и посветеност, резултатите не изостануваат. Наша заедничка обврска е да создадеме подобри услови за работа, развој и напредок.

Општина Прилеп и во иднина ќе продолжи да биде поддржувач на фестивалот, затоа што веруваме дека културата е темел на идентитетот, а „Војдан Чернодрински“ е еден од најсветлите културни белези на нашиот град и нашата држава.

Како град, но и сите ние како поединци, мораме да продолжиме да се прашуваме,како да станеме подобри?” – истакна градоначалникот на Општина Прилеп, Дејан Проданоски.