ПОГЛЕДНЕТЕ: Гордо и достоинствено ООУ “Климент Охридски” – Прилеп го одбележа својот патрон празник
Денеска по повод 8-ми Декември патрониот празник на ООУ „Климент Охридски“ – Прилеп, во ова прилепско училиште се одржа богата програма, каде учениците заедно со директорот, наставниците и голем број на гости, пред присутните – гордо и достоинствено го одбележаа својот патрон празник.
На свеченоста, по повод одбележувањето на патрониот празник на училиштето присутни беа градоначалникот на општина Прилеп Борче Јовчески, директорите на повеќе училишта од Општина Прилеп, како и голем број на гости, ученици и родители.
“Нека е вечен споменот за Св. Климент Охридски и за неговото дело! Во мое лично име и во името на Општина Прилеп на сите православни христијани и на сите наши сограѓани им го честитам големиот христијански празник – „Св. Климент Охридски“ и им посакувам многу здравје, среќа и бериќет. Пред неговата биста во истоименото ООУ Климент Охридски, оддадовме почит. Светиот Климент Охридски е длабоко врежан во македонската историја, тој е еден од најистакнатите ученици на светите браќа Кирил и Методиј и првиот македонски архиепископ. Творец е на познатата Охридска книжевна школа, позната и како прв универзитет на Балканот и е најзначајниот македонски средновековен писател и педагог. Неговото духовно и книжевно дело е трајно врежано во историјата на Република Македонија и македонското културно наследство. Со својата активност и со своето дело на повеќе полиња, тој станал заслужен не само за македонскиот народ туку и за целиот христијански свет. За многу години празникот!” – истакна прилепскиот градоначалник Борче Јовчески.
