Нов ден – нова шанса за уште една победа на ФК “Победа”-овој пат играме против екипата на Академија Пандев
Како што се истакнува на официјалната Facebook група на ФК Победа, фудбалерите на Победа денес од 14 часот на Градскиот стадион „Гоце Делчев“ во натпревар од 11-тото коло на Првата лига ќе ја пречекаат екипата на Академија Пандев.
Црвено-белите осоколени по убедливата победа во Кратово во оптимистичка но работна атмосфера го пречекуваат реномираниот противник. Тимот полека се комплетира и во тренажен процес и на располагање на тренерот Бабунски се неколку фудбалери, а единствено ќе отсуствуваат исклучениот во Кратово Марио Наумоски и повредените: Теофан Кисески Илијоски, Филип Тодороски и Марко Симуновиќ.
Денешниот меч ќе биде одмерување на силите на два тима кои по 10 кола и 9 одиграни средби имаат освоено по 7 бодови, со по две победи, едно реми и 6 порази. Црвено-белите резултатски се во подобра форма за разлика од гостинот кој е во серија од 4 последователни порази.
Во секој случај ова своевидно дерби на дното се очекува да привлече солиден број гледачи на трибините а подршката на прилепската публика на домашниот состав треба да биде максимална во текот на сите 90 минути со цел црвено-белите да стигнат до посакуваниот трет овосезонски триумф.
