Кржеска: Oтвораме простор каде што преку песната, играта, носијата и музиката се среќаваат различни народи, култури и традиции

Синоќа во Прилеп се одржа главната фестивалска вечер на првиот меѓународен фолклорен фестивал „Итар Пејо“, кој на едно место ги обедини фолклорните традиции, песната, играта и музиката на учесниците од Македонија, Полска и Словачка.

Пред присутните гости и учесници се обрати претседателката на Советот на Општина Прилеп, Билјана Кржеска, која во своето обраќање им посака срдечно добредојде на гостите и истакна дека ваквите настани се значаен придонес за културниот живот на градот и за зачувувањето на традицијата.

„Денес отвораме простор каде што преку песната, играта, носијата и музиката се среќаваат различни народи, култури и традиции. А токму во тоа е убавината на фолклорот, тој нè потсетува дека, иако можеби зборуваме различни јазици, преку културата и уметноста сите можеме да се разбереме.“

Фестивалската вечер донесе богата програма и настапи исполнети со енергија, традиционални ритми и автентични фолклорни елементи, претставувајќи го културното богатство на земјите од кои доаѓаат учесниците.

Претседателката Кржеска во своето обраќање упати и благодарност до организаторите за нивниот труд и посветеност во создавањето на оваа меѓународна културна манифестација.

„Особена благодарност упатувам до организаторите за нивниот труд, посветеност и ентузијазам со кој го создадоа овој фестивал и го донесоа Прилеп на мапата на меѓународните фолклорни средби.“

Таа истакна дека поддршката на културата и традицијата е важен дел од грижата за развојот на градот, а вложувањето во вакви настани значи вложување во културното наследство и во иднината.

„Поддршката на ваквите настани е вложување во културното наследство, во младите, во уметниците и во иднината на Прилеп.“

Со своето прво издание ,,Итар Пејо“ испрати порака за пријателство, културна размена и заедништво, покажувајќи дека фолклорот има моќ да ги поврзува луѓето и народите, без оглед на границите и јазичните разлики.

Општина Прилеп упатува благодарност до сите учесници од Македонија, Полска и Словачка, до организаторите, уметниците, фолклористите и сите љубители на традицијата кои беа дел од оваа прекрасна фестивалска вечер.

Овој фестивал се надеваме дека ќе прерасне во традиција која секоја година ќе носи нови гости, нови култури и нови пријателства во нашиот град.