Вечерва, Општина Прилеп излезе со најновите информации во однос на пожарот кој сеуште е активен во прилепскиот крај
Во прилог, го проследуваме соопштението од Општина Прилеп за пожарот кој сеуште е активен во прилепскиот крај:
“Денешниот ден на терен во областа на Мариово беше исклучително тежок и предизвикувачки поради големиот пожар кој, за жал, се прошири и се доближи многу блиску до населеното место Крушевица како и до манастирот Свети Никола во Прилепец.
Вечерва ситуацијата дополнително се влоши, бидејќи огнот, поддржан од силниот ветер, се спушта кон манастирот Свети Димитрија во село Селце а повторно наближува и до населеното место Бонче!
Ситуацијата во одредени моменти беше навистина алармантна, што не натера да објавиме апел до сите граѓани кои се чувствуваат подготвени да помогнат во активното локализирање на пожарот на најкритичните точки. Упатуваме огромна благодарност до сите екипи и доброволци кои со своите напори го спречија огнот да се доближи до објектите во населените места. Посебна благодарност и до екипата на Црвениот крст, која ја посети областа, доставувајќи храна и вода до жителите, особено во населените места кои беа без електрична енергија поради огнената стихија.
